مساء الخير، من سنة لليوم، خسرنا أكتر من 250 ضحية بحوادث السير بلبنان… بيناتن أطفال كانوا رايحين عالمدرسة، شباب بأوّل الطريق كانوا راجعين من سهرة، وأهل كانوا راجعين عبيوتن وما وصلوا! صرنا كل يوم منسمع أخبار حوادث سير جديدة، وكل يوم منخسر ضحايا جداد! السرعة، الإهمال، الطرقات المحفّرة، غياب الإنارة، غياب الرقابة، وعدم تطبيق القوانين… كلّها عوامل عم تزرع الخطر وتخطف الأحبّة. ما بقى في شارع آمن، ولا رصيف محمي، ولا نظام مرور واضح. ومع تفاقم فوضى القيادة، من سيارات لدراجات نارية، الناس عم تدفع الثمن من أرواحها. بحلقتنا الأخيرة من هالموسم، منوقف دقيقة صمت على كل ضحية راحت فجأة، وبنفتح مساحة صوت لكل شخص بعدو موجوع، لكل بيّ مفجوع، ولكل أمّ بعدها بتسأل: ليش؟ منختم الموسم بصرخة... مش لنودّع، بل لنتذكّر إنو السلامة ما لازم تكون حلم، وإنو القانون لازم يتطبّق حتى الناس تعيش!