لبنان كان على موعد مع موسم سياحي واعد… المطار كان عم يتحضر لاستقبال آلاف السّوّاح، فنادق عم تمتلئ بالحجوزات، ومغتربين ناطرين يرجعوا. وفجأة، كل شي توقف… حرب خاطفة بين إيران وإسرائيل… خضّت المنطقة، وضربت المواسم، وأصابت السياحة في صميمها. اليوم، وبعدما توقفت الحرب… ورغم كلّ الأزمات اللي بعد ما التقالها حلول، رجع لبنان ينبض بالحياة والسياحة، من جبال الأرز لشواطئ الجنوب، ومن المهرجانات للمطاعم! فهل بعد عنّا وقت لننقذ صيف 2025؟ وهل منملك فعلاً ما يلزم لنصنع موسم سياحي ناجح؟ وشو التحديات اللي بتواجه القطاع اليوم؟ بحلقة اللّيلة من "حقك بإيدك"، رح نطرح واقع السياحة متل ما هو، ونحاول نعيد الأمل بقطاع بتعيش منو آلاف العائلات، مع ضيوفي بالأستديو: رئيس اتحاد النقابات السياحية ونقيب أصحاب الفنادق بيار الأشقر، نقيب مكاتب السفر والسياحة جان عبود، ورح يكون معنا كمان عبر زوم الأمين العام لاتحادات النقابات السياحية جان بيروتي.