كتار بعدن بلبنان بيتعتبروا انو تربية النحل هي هواية أكتر منّا تخصّص أو مهنة، وانّو عدد اللي بيربّوا نحل محدود جدا وانّو لهالسبب بيتم استيراد أنواع متنوّعة من العسل الطبيعي الصافي وغيرو... ولكن اللي ما بيعرفوه انّو تربية النحل هي اليوم مصدر دخل أساسي لأكتر من 6 آلاف عيلة على امتداد الأراضي اللبنانية، بالتالي هالقطاع بينتج بلبنان حوالى ألف ومئتين طن من العسل سنويا. وبحسب إحصاءات وزارة الزراعة بيوصل عدد قفار النحل لحوالى 417 ألف خليّة. والنحل، لَيلّي ما بيعرف، هو، الى جانب قيمته الغذائية والاقتصادية والصناعية، مرصد لمراقبة التوازن البيئي، لأنّو إلو دور أساسي بتخصيب النباتات والاشجار وبيحافظ على التنوّع البيولوجي، كما صار عم يتم استخدام سم النحل كعلاج لعدد لأمراض وأوجاع عديدة وحتى انّو عم يُستخدم لمنع نمو الأورام السرطانية. وكأنّو ما بيكفي مربّين النحل تداعيات الأزمة الاقتصاديّة الحادة عليهن متل سائر القطاعات، والحرب بالجنوب على إثر العدوان الاسرائيلي واللي حرقت عدد كبير من قفران النحل، وكلها أمور أدت الى خسائر كبيرة بالقطاع، مجزرة بيئية كبيرة بحق قطاع النحل عم تشهدها اليوم المناطق الساحلية نتيجة رشّ المبيدات الزراعية على الأعشاب البرية والخضار، الأمر اللي بيهدّد عيل بكاملها برزقن ولقمة عيشن، وسط عجز النحّالين تجاه الموضوع وصمت الجهات الرسمية المعنية. اللّيلة نحّالين من مختلف المناطق اللبنانية جايين يطلقوا الصّرخة من منبر برنامج "حقّك بإيدك"، ويطالبوا بوضع حد للرشّ العشوائي للمبيدات وايقاف هالمجزرة قبل فوات الأوان. معي بالاستديو بالجزء الأول: رئيس جمعية مزارعي ونحالي لبنان المتجدد أستاذ علي شقير، المزارع ومربّي النحل الأستاذ فادي المصري من صاليما المتن، وبالجزء التاني رح تنضم إلنا المهندسة الزراعية ايليانا عيد، وبالجزء التالت رح يكونوا معنا المزارع والنحّال من النبطية مجيد كويس، والنحّال جورج سليمان من الفريكه المتن.