December 30, 2023

بغضّ النظر اذا كنّا منآمن بعلم الفلك والابراج أو لأ، تعوّدنا ليلة راس السنة انو ننطر التنبّؤات اللي مصدرها حركة الفلك والكواكب، وتأثيرها على مستقبلنا، ونحاول نتفاءل بالتوقّعات الايجابية واللّي بتحمل الأمل بغد أفضل، عسى انّو ما تشكّل التنبّؤات المقلقة وغير الواعدة، اذا صحّ التعبير، مصدر للهمّ والحزن ودافع لننعي السّنة قبل ما نبلّشها. واللّيلة، رح نعرف عالمة الفلك والأبراج والأسماء والأرقام جومانا وهبي شو عندا من معطيات وانشالله ايجابية عن العام 2024 . ولكن، انّو نكون منآمن بالغيب أو حتى بالحظ، ما بيعني ولا بأي شكل انّو نحنا مش أسياد مستقبلنا ونحنا اللّي منصنع بكرا ومنقدر نقرّر مصيرنا، رغم كلّ الصعوبات والتحديات اللّي عم يمرق فيا البلد أو اللي بتواجهنا نحنا بحياتنا. وضيفاتي بالجزء التاني من الحلقة، الممثلة كارلا بطرس والسّيدة مصمّمة المجوهرات نزهة الخوري شرارة هنّي خير مثال على ذلك، لأنّن سيدات مُلهمات قرّروا، بادروا وحقّقوا انجازات من دون ما ينطروا توقّعات الفلك، ورح نسمع منّن اللّيلة تجربتن اللي منأمل تكون محفّز لكلّ طموح على أبواب السنة الجديدة.