November 11, 2023

لماذا ترتفع معدّلات الطلاق مقابل تراجع الزواج في لبنان؟

"كنّا ثنائي رائع، ولكن الأيام غيَّرتنا. العمل وتدخلات العيلة والروتين، أسباب حوَّلت علاقتنا لدراما يومية ما فيا شي جديد سوى تدهور أحوالنا المعيشية، خصوصاً مع تفاقم أزمات البلد." بتختلف الأسباب والنتيجة واحدة: البيت اللي انبنى على الحبّ أوّلاً، بتنهار أُسُسه وبتنتهي العلاقة الزوجية بالانفصال ومن ثم الطلاق، بعدما يعجزوا الطرفين عن التوصّل لحلول لإعادة إحياء العلاقة. واللافت انّو عقود الزواج المصرّح عنها لدى المديريّة العامّة للأحوال الشخصيّة، سجّلت تراجع كبير بين 2012 و2023، وبالمقابل، ارتفع عدد عقود الطلاق بالفترة نفسها. وبحسب آخر الإحصاءات بالمحاكم الشرعية والروحية، ارتفعت نِسَب الطلاق خلال السنوات الأربع الماضية، علماً انو في فرق كبير بالنسب بين المحاكم الإسلامية (السنية والجعفرية)، وبين المحاكم المسيحية، اللي معروف انو الطلاق فيا هو مسيرة جلجلة طويلة وصعبة. صحيح انّو نِسَب الطلاق بلبنان عم ترتفع، ولكن هيدي منّا الظاهرة الرئيسية، على أهميتها. فوجود نسبة كبيرة من المرتبطين من جيل الشباب، عم تطلب الطلاق، بعد الزواج بفترة قصيرة، وبسهولة مطلقة، ببلد كان الطلاق فيه من المحرّمات.. وهيدا الموضوع هو كلّ القصة! أمّا الظاهرة اللافتة اليوم، فهي بحفلات الطلاق اللي صارت "تراند" جديدة بلبنان، بتنافس حفلات الأعراس، وما بتغيب عنّا أجواء الفرح والرقص والغناء، بالاشارة لوداع الحياة الزوجية وبداية حياة جديدة للمطلّقة أو المطلّق. شو أسباب ارتفاع نِسب الطلاق وتراجع الزواج بلبنان؟ وشو تداعيات هالواقع على المستقبل؟ وشو السبيل لتحصين الزواج ومنع تشرذم وتفكيك العيلة نتيجة خيار الانفصال والطلاق اللي، بيبقى رغم كل المظاهر المستجدة، رحلة معقّدة وبتؤثر بالعيل والأفراد والمجتمعات، وبيضرب بشكل أو بآخر القيم ومفاهيم الالتزام والحب والاخلاص والاحترام عرض الحائط. معي الليلة بالاستديو، ضيوف عاشوا تجربة الطلاق بلبنان، ورح يشاركونا تجربتن والتحديات اللي واجههوها واذا قدروا يتخطّوها وكيف: ميرانور كركي وعبدالله عقيل، وأيضا رح يكونوا معنا خلال الحلقة الاختصاصية في علم النفس العيادي ريتا الأسمر بريدي والمحامي بالاستئناف بنقابة المحامين ببيروت الأستاذ جورج الرّيّس، اللي رح نبحث معن بالأسباب والتحديات الاجتماعية، النفسيّة، الاقتصادية، التربوية والثقافية، والاجراءات القانونية، طبعاً.

ضيوف الحلقة: ميرانور كركي
عبدالله عقيل
محامي بالاستئناف في نقابة المحامين بيروت جورج الرّيّس
اختصاصية في علم النفس العيادي ريتا الأسمر بريدي