كل الفنون اللي أبدع فيا الإنسان، كانت مشاركي منّو لألله بالخلق. ويمكن أجمل الخلق، هو المرا اللي فينا نقول إنو هيي الجمال. بحلقة "نقطا فاصلي" اليوم، رح نتمرّا بالجمال: بنقاء الروح، بسمفونية اللَّون، بخيال الريشي، بملعب الصابيع، بوسع الأفق والمدى، بوجوه القداسي والإيمان، بوجوه الناس، بلوحات الطبيعا، بالبيوت القديمي، بموج البحر، بزيتون لبعا، بصنوبر بكاسين، بشلال جزين وسيدة المعبور. حلقا تحت عنوان "سمفونية اللون"، بيجسدا فنان تشيكلي لبناني، وعي ع حالو من زغرتو بينادوه الفنان. وبين طفولي بلبعا، وتهجير ع بيروت، وعودي لأرض الآباء والجدود، مسيرا كوَّن فيا شخصيتو الفنيي، بعدما تخرج بمعهد ميكلانج للرسام المبدع الراحل أسعد رنو. نوَّع أعمالو بكل أنواع الرسم، وصولًا لتكوين شخصيي فنيي، موزعا اليوم بين الجداريات الكنسيي، والرسم التكعيبي. شارك بعشرات المعارض، ومثَّل لبنان بأكتر من فعاليي، والأهم صار عندو مدرستو ومعرضو الدايم: محفوظيات. نقطا فاصلي بيرحب بالفنان التشكيلي الصديق غسان محفوظ.