March 11, 2023

حلقة الليلة استثنائية لأنو ضيفاتي هنّي استثنائيات، مش لأنّن ضيوف من الهند والكاميرون واثيوبيا، بل لأنّن واجهوا، بشجاعة وارادة صلبة، مصاعب الحياة ووصمة العنصرية والتمييز بسبب بشرتن السمرا ومركزهم الاجتماعي والاقتصادي، وهيدا رغم انّن مجرّدين من أبسط حقوقن بمجتمع لا يزال بينظر لئلن بنظرة دونية. الليلة رح نتعرّف عليهن أكتر، رح نتعرّف على وجهُن الآخر، ورح نستمع لقصصن يلي هي عالأغلب مهمّشة أو ما حدا بيحكيها، وكل قصة هي بجوهرها قصة انسان بتجمعنا معو العديد من القواسم المشتركة، انسان بيعتبر انو بشرتو وشخصيتو الإفريقية او الآسيوية بيشكلوا علامة فارقة وفخر لئلو، وعندو كل الأمل بإنو يوصل نهار يتخلّص فيه من وصمة الثقافة العامة للمجتمعات، اللي بتصوّر كل مين عندو بشرة سمراء، على أنن عبيد سابقين أو مجرّد عمّال، وبالتالي يصير كل مجتمع وكل انسان يتعامل معو بمساواة.