January 14, 2023

صحيح إنو الزجل نْشهر بمشهديتو المنبريي. بس مين قال إنو إزا قريتو بديوان، ما بيصيرو الدفوف يخشخشو قبال عينيك؟ وإنك تنطلق من الزجل ع آفاق أرحب بتجمع بينو وبين القصيدي المحكيي باللغا اللبنانيي، يعني بتكون ميزت حالك بين الشعرا. هيدي حال ضيف "نقطا فاصلي"، اليوم، إبن ضيعة الحرف الجزينيي، إستاز رياضيات، وعم يعد أطروحة دكتوراه، بالجغرافيا، عن حوض الأولي والآثار البيئيي لمشروع سد بسري. بيعتبر الشعر، ومن ضمنو الزجل اللبناني، من أرفع الفنون، وبينظرلو كإرث قومي ووطني، مش هين. صدرلو ديوان عنوانو "أول العنقود"، سنة 2018، وعندو تلات دواوين جاهزي للطبع. عضو مؤسس وفاعل بالمجلس الثقافي بمنطقة جزين، وشارك وحضر ونظم ندوات ثقافيي وشعريي تناولت أعلام كبار من لبنان، متل الأديب بولس سلامة والنايب السابق جان عزيز والأب روفائيل مطر، والمفكرين الأخوين أمين وبهجت رزق. تحت عنوان أول العنقود، بيسر نقطا فاصلي يستضيف الشاعر إبن الشاعر، الإستاز الصديق جوزف الحاج.