November 5, 2022

نقطة فاصلة مع كارمن سعادة ونافذ فنيانوس تحت عنوان "رح تبقى عوني؟"

بالفعل شو تكون ست سنين بعمر الوطن؟ طوي الرئيس ميشال عون صفحا من صفحات تاريخو اللبناني الحافل بالمواقف والبطولات والمواجهات والرؤيا الاستراتيجيي، والانتصارات والانكسارات والخيبات، وبعدو إيمانو كبير بخلاص لبنان وبشعبو العظيم. كل عمرو يحكي عن الدور والموقع. الدور هو يكون القائد الحريص ع الحريي والسيادي والإستقلال ووحدة الشعب والأرض، والموقع، بأي موقع كان رح يضل القائد. بيطوي صفحة الموقع، وهو اللي بيعرف، وأكتر مين بيعرف، إنو "لو دامت لغيرك لما اتصلت إليك"، وبيرجع للدور اللي هو رسمو لنفسو، من يوم اللي تفتح وعيو الوطني ع السياسي، ت يأكد إنو باقي بساحة النضال لآخر نفس من حياتو، المديدي بعد كتير، بعون الله. دور اليوم بيتلخص بمعركة التحرر اللي هي أصعب بكتير من معركة التحرير. بعدك عوني؟ سؤال تهمي واجه العونيين وأبناء التيار الوطني الحر، بزمن الهيلاهو. تبددت الهيلاهو متل فقاقيع الصابون، وبقي العوني عوني. رح تبقى عوني؟ سؤال بتطرحو حلقة نقطا فاصلي اليوم، بعد انتهاء عهد الرئيس عون، اللي بعض الخبثا والجهلي والمتنمرين والحاقدين والمتآمرين بيعتبروه نهاية الحالي العونيي، واللي ما بيجوز إلا ما نشفق علين، ونقول يا حرام. رح تبقى عوني، سؤال بيجاوبو عليه تنين عونيين، ومنتسبين للتيار. نافذ فنيانوس إبن زغرتا، اللي خدم لبنان بأحد الأسلاك الأمنيي الرسميي، وترهبن للحالي العونيي وللتيار من سنة 1988، وتولى مناصب قياديي بالمؤسسي التياريي، وإعلامي وصاحب مواقف جريئا وواضحا ع وسايل التواصل، مكلفتو لهلق عشرات الدعاوى القضائيي، وبعدو ورح يضل عوني. وكارمن سعادة، بنت الحدت، اللي ربيت ببيت عوني، ووعيت ع الحالي العونيي، رح تنجز دوكتوراه بالتربيي الموسيقيي وإجازي بالصحافي، وهي إستازي جامعيي، واللي ما انتسبت للتيار إلا من وقت قليل، بعدما صار سؤال "بعدك عوني"، تهمي... أهلا بالصديقا كارمن سعادة وبالصديق نافذ فنيانوس.