August 13, 2022

صحيح الخيال ما إلو حدود، وصحيح كمان إنو الخيال هو اللي بيدفع العلما يقبضو ع حقايق ويكتشفو أسرار الكون، بس الصحيح كمان إنو أهل الخيال بيحلمو وبينتقلو لحلم جديد، أما العلما فكل تفصيل بالحلم بيتطلب منن درس وبحث وبيزدلن ع همومن هم جديد. رح تبقى هـ الأرض؟ رح تفنى البشريي قريبًا؟ في شي كوكب يكون بديل من الأرض؟ معقول يكون المريخ اللي مساحتو نص مساحة الأرض، واللي هو جارا؟ فكيف إزا كانو أهل الأرض مريخيين، ومن هـ المنطلق عم يبحثو أهل العلم، كيف ممكن ينقلو أهل الأرض عليه، شي يوم. هـ الأسئلي وغيرا، موضوع حلقة نقطا فاصلي، اليوم، مع عالمة الفيزيا الفضائيي، بمركز جيمس ويب، والدكتورا بالفيزيا الفضائيي مش الفلكيي، بمركز الطاقا الذريي، والمهندسي بوكالة الفضا الأوروبيي، والأستاذي الجامعيي، والشاعرا وعازفة البيانو والرسَّامي، واللي بيسعدني إستقبلا للمرا التانيي، وكانت الحلقا وقتا تحت عنوان مين الخلق، ألله أو الشاعر، وكان ضيفا الآخر الشاعر مارون أبو شقرا. نقطا فاصلي بيرحب بالدكتورا سيرين نعمة.