موضوع الحلقة: "تأملات ميلادية" ضيف الحلقة: الراهب اللبناني الأب جوزف دكاش دخلنا زمن الميلاد. ميلاد يسوع المخلِّص، بكل المعاني اللي بتحملا هـ المناسبي: البشارا، الخلاص، التَّجسُّد، فرح الولادي، التَّواضع، قناعة مريم وقبول مشئية الربّ، تضحية يوسف، العطاء المجاني، الْمَحبّي الغامرا اللي بتشمل حتَّى الإعدا. دخلنا زمن الميلاد، وبيبقى الفرح أقوى من أي معاناة عم نعيشا اليوم، والدليل كل مغارا أو سجرة ميلاد زيَّنو كل بيت، وكل ساحا. والدليل كل نجمة صبح، انْ كانت بالقلب، أو بالسَّما، عم تبشر بالولادي الإلهيي. "نقطا فاصلي"، عشية هـ العيد المجيد، بيخصِّص هـ الحلقا لـ "تأملات ميلاديي"، مع راهب من الرهبانيي المارونيي اللبنانيي، بيعيش إيمانو المسيحي باللاهوت وبالصلا وبالتأمل وبالشعر وبالترنيمي وبالترتيلي، وبسِيَرْ اللي سبقوه من الرهبان ع درب القداسي، وبريحة الأرض اللي أنجبتو، بلدة فتري الجبيليي. تولى مسؤوليات كتيري بالرهبانيي، وإلو مجموعة مؤلفات دينيي، بتقوم ع التأمل وبتمتاز بالعمق اللاهوتي والإنساني: "نجاوى على قبر رفقا"، "بيني وبيني"، "هو معي"، "في سكون الليل"، "بفيِّة العدرا"، بالإضافي لمجموعة تراتيل كتبا، وانتشرت بالأجواق وبكنايس لبنان، الراهب اللبناني الأب جوزف دكاش، ضيف نقطا فاصلي.