May 22, 2021

النَّبع العالي كتار بيشربو من ميّتو، وقلال اللي بيعرفوه. البحر الوسيع بيساع يمكن بعينتين، وْفي شراع واحد بيسفّرو وبيردّو ع الشَّطّ. الغيم المعتق بيحجب الشَّمس، وفي مطلّ تاني للشَّمس بتشرق منّو، مش إلّا عينيه وباب قلبو المشرَّع ع الحبّ. والمحبرا بيلفو عليا قلام كتار... بس في قلم واحد بيتجوَّزا. بهـ الكم كلمي بيحتفل "نقطا فاصلي"، بحلقة اليوم، اللي عنوانا: "الشعر زاكرة الجمال وبكرا الجمال"، بشاعر من أبرز شعراءنا بآخر أربع عقود، ويمكن قلال اللي بيعرفو مين المرا اللي سماها التفاح. وقلال اللي تعرَّفو ع جسما عريس السِّنبلي. وقد منّو صادق وواضح، ما سْتحى يقول "مغروم ما تقولو لحدا"، وكان الليل ماشي ع الورق. هس... ع السِّكَّيت، هيدا صوتو وهو وبيعرفو، وجرن حبرو ما بيفضى، وكيف بدو يفضى، وهو ملك ع بواب الفقرا، كنَّس الفوضى ع باب العدل، ودقّ كتفو بالسَّما وما عرف، وبعدو بيهرِّب قصايد لبيروت، وبيضيِّف شعرو رغيف للسَّوْرا. الشاعر الصَّديق، الكاتب العدل، ميزان للعدل والصِّدق والمحبّي... الأستاذ سمير خليفة