January 9, 2021

نقطة فاصلة بحوار مع روح الياس الرحباني، عبقري النغم والرؤية... المظلوم

حلقة نقطا فاصلي الليلي، ما فيا ضيف.

ضيفا روح.

روح الياس الرحباني عبقري النغم والرؤيا… المظلوم. وبسياق هـ الحلقا المبنيي ع مقابلي تلفزيونيي ببرنامج نقطا فاصلي ع شاشة "أو تي في" بـ 30 حزيران 2009، وع مقابلي بإزاعة لبنان السقافي بـ 22 شباط 2013، رح نعرف شو يعني عبقري نغم ورؤيا وليش الياس رحباني مظلوم.

الياس رحباني بهـ الحلقا التزكاريي بعد غيابو الموجع، هو بيحكي عن حالو، وبيكشُف رؤيويتو وعبقريتو، ورح إسمح لنفسي من خلال متابعتي لأعمالو، ومعرفتي الشخصيي فيه، وحواراتنا الكتيري بمناسبات كتيري، ضوّي ع فرادتو وعبقريتو، من خلال 35 غنيي ومعزوفي وعمل… بيكفي إزا ما عندو غيرن، وهو عندو بحدود الـ7000، يكرِّس حالو علم من أعلام الفن.

لا رح إحكي قصة حياتو، ولا رح جيب سيرة الأكتر من 100 مطرب ومطربي ومغني ومغنيي تعاملو معو. اللي عملتو إني اختصرت كل مسيرتو اللي بلشت سنة 1957 بغنيي لحَّنا إسما "يا محلاها"، بكم فكرا هو عبَّر عنُّن، وكم عمل بعتبرن روايع.