لأنّو تفعيل دور القطاعين الزراعي والصناعي أمر أساسي بلبنان، خصوصا بخضم الأزمات الاقتصادية الحادّة، متل اللي عم نشهدها بالفترة الأخيرة، وحتى ما نوصل لمتل الايام اللي وصلنالها، واللي صارت فيا الدولة عاجزة عن تزويد مواطنيها بالمواد الغذائية والخدمات الأساسية، انطلقت مبادرة رابطة كاريتاس لبنان "إنتاجنا" بخلق تعاونية المحبة لتصريف الانتاج الأهلي "إنتاجنا" بالعام 2005، وكان كل الهدف منها بناء نموذج اقتصادي مستدام من شأنه الحد من التفاوتات بين المناطق وضمان الأمن الغذائي. المبادرة ما وقفت وبعدا مكمّلة، واليوم أكتر من أي يوم مضى، خصوصا بظل الأوضاع الصعبة اللي عم يمرق فيا البلد والمنطقة. من الضروري، مبارح قبل اليوم، واليوم قبل بكرا، انّو كل شخص لبناني، بيحب لبنان، يدعم هالمبادرة من مطرح ما هوّي: المزارع بالريف قادر يفيد ويستفيد، كل سيدة بالريف قادرة تكون فاعلة وتفيد المشروع من خبرتها وتستفيد، وكل طالب لبناني جامعي حابب يشتغل ليؤمّن مصروفه بيقدر كمان يحصل على فرصة عمل ضمن المشروع، وبدورو كل مواطن، داخل لبنان وبالخارج، قادر يستفيد من جودة الصناعات الغذائية وأسعارها وبنفس الوقت يشجّع مؤسسة هدفها نبيل وسامي، هدفها خدمة الانسان ودعمو ليبقى بأرضه وما يعوز حدا، "من خير الأرض لخير الانسان" متل ما بيقول شعار "إنتاجنا". تا نعرف أكتر عن "إنتاجنا" معي بالأستديو الرئيس الأسبق لكاريتاس لبنان الأب لويس سماحة، مدير قسم الاعلام والتواصل في كاريتاس مازن مصوّر ومدير التسويق والمبيعات في كاريتاس جو معلوف.