خبر العصابة المتورّطة باغتصاب أطفال وقُصَّر وإجبارُن على تعاطي المخدرات وابتزازُن بعد تصويرُن، هزّ لبنان والعالم وتحوّل لقضية رأي عام، خصوصاً انّو العصابة كانت عم تستخدم تطبيق التيك توك لاستدراجُن. واللّافت بالموضوع انّو أبرز أعضاء هالعصابة هنّي من مشاهير التيك توك والمؤثّرين، استغلّوا شهرتن ومحبّة المتابعين إلن، لتحقيق مآربُن الشخصية واللاأخلاقية ويسرقوا براءة الأطفال! وبعد الصدمة الاجتماعية العارمة اللي أحدثتها هالقضية، أسئلة كتير عم تتردّد اليوم على كل لسان: شو مصير هالعصابات اللّي عم تدمّر مستقبل شبابنا؟ وعلى رح تُستَكمل التحقيقات بهالملف اللي بيهدد مجتمع بكاملو، للاخير، ويتحاسبوا المجرمين فعلا ويكونوا عبرة لغيرُن؟ وكيف منقدر نحمي أطفالنا وشبابنا من مخاطر مواقع التواصل الاجتماعي، والتيك توك تحديدا، واللي أصبحت اليوم بمتناول الجميع، صغار وكبار؟ بحلقة الليلة من "حقك بإيدك" رح نحاول نجاوب على هالأسئلة وغيرا من التساؤلات اللي عم تراودكم بالفترة الأخيرة، مع ضيوفي بالأستديو: نائب الرئيس الاول لاتحاد حماية الاحداث في لبنان المحامي الدكتور جانو جوزف حداد، المعالجة النفسية شارلوت خليل، وعبر زوم: الخبير في التحوّل الرقمي وأمن المعلومات رولان أبي نجم.